عايزين نعيش.. ونداري آخر دمعه

للشاعر/ هشام فتحي

إنها صرخة المحرومين..  والحلم الهارب من عيون البسطاء الجائعين..  والوتر الشارد في موال المجروحين .

أي هذه الأحلام يحضنها المنام الهادئ.

وأي هذه الأمنيات في دنيا الواقع المرير.

هي لحظة وتهز صمت النائمين ..  هي صرخة تعيد صبح الثائرين.. "عايزين نعيش"

عايزين نعيش

ونداري آخر دمعه

في عيون الزمانْ

عايزين نعيش

ونعيد حكايات المخاوف بالأمانْ

وتطير  بلابلنا الحزينة

ترد لقلوبنا الحنانْ

كان يا ما كان

كان فيه بلاد متبعثره

وخريطة فوق وصف المكانْ

وخيوط ألم

بين الحدود

وبيوت ركام

ومدينه تايهه بين ربوعك يا وطن

تلعن عبارات السلام

كرهت شوارعها الكلام

مكتوب عليها كلمتين

"من ألف عام ..فات الأوان"

أنهار بتجري

والعطش يحرق شجر ْ

ألفين طاحونة

والمجاعة ساكنه في بطون البشرْ

والناس بتهرب م الظلام

وهناك بتحلم بالقمر

وولاد بلدنا الطيبينْ

عدت على دموعهم سنينْ

وما بين قلوبهم

زي كل المحرومينْ

وما بين عيونهم

زي كل المجروحينْ

وف مره زاروا الشيخ أمين ْ

يا عم يا شيخنا الأمين

أنت فاكر لما زرناك من سنين

واشتكينا شيخ بلدنا

وابن عمدتنا اللئيمْ

وخطبت فينا خطبتين

"اقروا يا ناس

الربع من آخر ياسينْ

(عدة ياسين)

واحفظ يا رب العمدة

وولاده التِّنِينْ

من كل شر

وكل قر

وكل عينْ

دلوقت ليه في السجن

ألفين من شبابنا

وبأي حق يا شيخ أمين

العمده راح يسرق عرقنا

وبأي حق ابن اللئيم

يضرب ولادنا

يعني إيه يا شيخ أمين

إنّ الكبير باعك وباعنا

يعني إيه يا شيخ أمين

النور بيهرب من شارعنا

يعني إيه طول السنين

بنبات بجُعنا

يعني إيه طعم الأسى

ساكن قلوبنا

يعني إيه مد الايدين

والحزن حاضر يوم فرحنا

يعني إيه فوق الكباري

تعدي وتشاهد بناتنا

يعني إيه يوم الخميس

نربط حجر على طول بطونا

ونبات بنحلم بالرغيف

والرماد ساكن عيونا

قام رد عم الشيخ أمين

يا ولاد بلدنا الطيبين

أنا م النهارده

نسيت خلاص عِدة ياسين

وهنقرأ سورة الزلزلة

ونقول خلاص

عدت سحاب

وخيام بترميها الرياح

وف كل باب

عنوان تعازينا الجراح

ومشاهد التيه البعيدة

ساربة بين سكة سراب

والحلم راح

وف لمحة ضاعت كل أحلام الشباب

ولحد امته نعيد ونحكي

في اللي فات

وما عدش لينا في الزمن دا

غير ملامح ذكريات

غير شوارعنا القديمة

والعراجين الموات

غير شراعنا في السفينه

وكل موجه وشط مات

باع ربوعك يا وطنّا

العمده وولاد الذوات

مين هناك

مين يجيب الصبح لعيون النهارْ

مين يصحّينا

من الذل اللي صارْ

مين يصلي الفجر

ويقول القرارْ

يقرا سورة الانفطارْ

يمحي ليلك

يا وطن داق المرارْ

هيه لحظة عز

ونهز المدار

الأحد الموافق

4/5/1431 هـ

18/4/2010م

عودة الى ديوان الشعر